Ülvi Mansurov Azərbaycan Biznesinin İnkişafı Fonduna sədr təyin edildi

Rock.News xəbər verir ki, bu təyinat Ülvi Mansurovun karyerasında yeni bir mərhələdir. O, bundan əvvəl «Azərbaycan İnvestisiya Şirkəti» ASC-nin icraçı direktoru vəzifəsində çalışıb.

Ülvi Mansurov 1983-cü ildə Bakıda anadan olub. Azərbaycan Dövlət İqtisad Universitetində bakalavr və magistr dərəcələri alıb. 2015-ci ildə Böyük Britaniyanın Vorvik Universitetinin Biznes Məktəbində MBA dərəcəsi, 2024-cü ildə isə biznes idarəçiliyi üzrə doktorluq dərəcəsi əldə edib.

Əmək fəaliyyətinə Azərbaycan Beynəlxalq Bankında (ABB) başlayan Mansurov, 2001-2012-ci illərdə ABB-də müxtəlif vəzifələrdə çalışıb. Daha sonra, 2012-ci ildə “Bank Technique” ASC-nin İdarə Heyətinin sədri, 2015-ci ildə isə ABB-nin İdarə Heyəti sədrinin müavini vəzifəsinə təyin olunub.

2017-ci ildən “Azərpoçt” MMC-nin baş direktoru, 2018-ci ildən Vergilər Nazirliyinin İqtisadiyyat sahələrinin analitik təhlili və ekspertizası departamentinin baş direktoru vəzifələrində çalışıb.