Qarabağda yeni mədənlər: AzerGold geoloji kəşfiyyatın nəticələrini açıqladı

Rock.News xəbər verir ki, təqdimat dövlət şirkətinin Qarabağ və Şərqi Zəngəzurda apardığı geoloji kəşfiyyat işlərinin əsas istiqamətlərini işıqlandırıb. Bu fəaliyyət Azərbaycanın mineral-xammal resurslarından istifadənin səmərəliliyini artırmaq və yeni mədənlərin istismara verilməsini təmin etmək məqsədi daşıyır. Azərbaycan Respublikası Prezidenti cənab İlham Əliyevin 22 iyun 2023-cü il tarixli Sərəncamına əsasən, “AzerGold” tərəfindən Kiçik Qafqaz sıra dağlarını (Qarabağ, Şərqi Zəngəzur, Qazax-Tovuz, Gəncə-Daşkəsən) və Naxçıvan Muxtar Respublikasını əhatə edən ümumilikdə 15 409 kvadrat kilometr ərazidə kompleks geoloji tədqiqatlar planlaşdırılır.

Ş. Musayev öz çıxışında helikopterlə həyata keçirilən aeroelektromaqnetik tədqiqatlar kimi müasir və qeyri-invaziv axtarış metodlarından bəhs edib. Bu üsulların əhəmiyyəti, qısa müddətdə perspektivli sahələri müəyyən etməsi, yüksək maliyyə tələb edən buruqqazma işlərinə qənaət etməsi və ekoloji cəhətdən səmərəli olması xüsusi vurğulanıb.

Geoloji tədqiqatların nəticələri yeni perspektivli sahələrin aşkarlanmasına və gələcək hasilat işlərinin dövlət tərəfindən təyin ediləcək operatorlar vasitəsilə həyata keçirilməsinə imkan yaradacaq. Müşavir həmçinin mövcud yataqlardakı ehtiyatların yenidən qiymətləndirilməsi üzrə görülən işlərdən və Şərqi Zəngəzur iqtisadi rayonunun Kəlbəcər ərazisində yerləşən Zod qızıl yatağında aparılan genişmiqyaslı geoloji tədqiqatların gedişatından ətraflı məlumat verib.

Təqdimatda şirkətin doqquz illik fəaliyyəti dövründə hasilat, ixrac, vergi və sosial ödənişlər, pərakəndə satış həcmləri və ümumi gəlirlər kimi statistik göstəricilər, eləcə də həyata keçirilən sosial məsuliyyət layihələri barədə məlumatlar iştirakçılara təqdim edilib.