Birbank və Visa müştərilər üçün Paris səyahəti kampaniyasına başladı
“Birbank” və “Visa” şirkəti yeni ortaq kampaniyaya start verib. Bu təşəbbüs çərçivəsində rəqəmsal bankın “Visa” taksit və debet kart sahibləri “Disneyland Paris”ə səyahət və nağd pul mükafatları qazanmaq imkanı əldə edəcəklər. Müsabiqəyə qoşulmaq üçün kart sahibləri xarici onlayn platformalarda və ya xaricdə POS-terminallar vasitəsilə ödənişlər etməlidirlər.
Rock.News xəbər verir ki, kampaniya 2025-ci il noyabrın 30-dək davam edəcək. Ümumilikdə 1 000 nəfər qalib seçiləcək. Hər iki kateqoriya üzrə ən yüksək dövriyyə göstərən ilk iki iştirakçı “Disneyland Paris”ə unudulmaz səyahət paketi ilə mükafatlandırılacaq. Qalan qaliblər isə pul mükafatları qazanacaqlar. Yalnız onlayn ödənişlər seqmentində 201-dən 800-dək yer tutan iştirakçılara əlavə olaraq hər birinə 20 AZN veriləcək.
“Birbank”ın Marketinq Ekspert Mərkəzinin rəhbəri Kamran Babaşov bildirib ki, onlar müştərilərə rahat bank xidmətləri ilə yanaşı, unudulmaz təcrübələr yaşatmağı hədəfləyirlər. O əlavə edib ki, bu cür təşəbbüslər rəqəmsal dövrdə sərhədləri aradan qaldırır və müştərilərin səyahətlərini maraqlı imkanlarla zənginləşdirir. Babaşov “Birbank” kartının təkcə ödəniş vasitəsi deyil, həm də “Disneyland Paris” kimi arzu olunan məkanlara aparan bir açar olduğunu vurğulayıb.
“Kapital Bank”ın brendi olan “Birbank”, ölkənin ilk rəqəmsal bankı kimi fəaliyyət göstərir. Mobil tətbiqinin 3 milyondan çox aktiv istifadəçisi var və 115 filial, 50 şöbədən ibarət geniş şəbəkə ilə xidmət göstərir. Bank 2025-ci ilə qədər “Kapital Bank” adı altında fəaliyyət göstərmiş və “PAŞA Holding” qrupuna daxildir.