İsrail 2026-cı ildə HAMAS-ın tərksilah edilməsinə nail olmağı planlaşdırır

İsrail 2026-cı ildə radikal Fələstin hərəkatı HAMAS-ın silahlı birləşmələrinin tam tərksilah edilməsinə nail olmağı qarşısına məqsəd qoyub. APA xəbər verir ki, bu barədə İsrail Müdafiə Qüvvələrinin Baş Qərargah rəisi, general-leytenant Eyal Zamir bəyan edib. Onun sözlərinə görə, 2026-cı il İsrailin təhlükəsizlik mühitinin formalaşdırılması baxımından həlledici olacaq. “Bizim HAMAS-ı tərksilah etmək əzmimiz qətidir. Terror təşkilatı HAMAS-ın öz hərbi potensialını bərpa etməsinə və bizə yenidən təhlükə yaratmasına imkan verməyəcəyik”, – deyə Zamir vurğulayıb. Baş Qərargah rəisi qeyd edib ki, İsrail ordusu hazırda Qəzza sektorunun daxilində yerləşən və “sarı xətt” adlandırılan mövqelər boyunca nəzarəti möhkəm şəkildə saxlayır. Onun sözlərinə görə, bu xətt “yeni təhlükəsizlik sərhədi” rolunu oynayır və zərurət yarandıqda operativ cavab tədbirlərinin sürətlə həyata keçirilməsinə imkan verir. “Biz vəziyyət tələb etdikcə HAMAS-ı zəiflətməkdə davam edəcəyik. Qoşunlar daim hazırlıq vəziyyətində olmalı və hadisələrin mümkün inkişafına hazır durmalıdır”, – deyə general əlavə edib.