ABŞ qanunsuz miqrantlara 3000 dollar təklif etdi: pulsuz getməyin yolu
ABŞ administrasiyası qanunsuz immiqrantların ölkəni könüllü tərk etməsi üçün mükafatı 3000 dollara qədər artırmaq qərarına gəlib. Bu təşviq, immiqrantların öz ölkələrinə qayıtmaları üçün maliyyə dəstəyi vəd edir.
Rock.News xəbər verir ki, bu barədə ABŞ daxili təhlükəsizlik naziri Kristi Noem açıqlama verib. Nazir, sözügedən ödənişin bu ilin sonuna qədər könüllü olaraq ölkədən getmək qərarına gələnlərə aid olduğunu bildirib. "Bu bayram mövsümündə ABŞ vergi ödəyiciləri qanunsuz immiqrantların ölkəni könüllü tərk etmələri üçün stimulu üçqat artırıblar. İlin sonuna qədər “CBP Home” Tətbiqindən istifadə edərək ölkəni tərk edən qanunsuz immiqrantlar 3000 dollar bonus almaq hüququna malik olacaqlar", - deyə Noem əlavə edib. Həmin şəxslərin təyyarə bileti də ABŞ hökuməti tərəfindən ödəniləcək. Bundan əlavə, immiqrasiya pozuntularına görə cərimələr və digər cəzalar da bağışlanacaq. Qeyd edək ki, bu ilin yanvar ayından bəri 1,9 milyon qanunsuz immiqrant ABŞ-ı könüllü şəkildə tərk edərək öz ölkəsinə qayıdıb.
