Asiya İnkişaf Bankı: Azərbaycan dəmir yollarında "yaşıl" inqilaba töhfə verə bilər

Rock.News xəbər verir ki, bu barədə Asiya İnkişaf Bankının (AİB) direktoru Sindi Sisneros Tianko “Azərbaycan Dəmir Yolları” QSC (ADY) ilə tərəfdaşlıq çərçivəsində keçirilən dekarbonizasiya layihəsinin təqdimatında bildirib.

Onun sözlərinə görə, Yaponiya, Çin, Avstraliya və Avropa kimi qlobal liderlər ağıllı, aşağı karbonlu dəmir yolu ekosistemləri qururlar. Azərbaycanın bu prosesdə iştirakı və gələcəyə töhfə vermək üçün unikal imkanları var. Layihə həm mühəndislik, həm də maliyyə sahəsində innovasiyaları bir araya gətirir. Bərpa olunan enerji, batareya saxlama sistemləri, ağıllı mikroşəbəkələr və karbon sekvestrasiyası kimi inteqrasiya olunmuş həllər vasitəsilə birbaşa fosil yanacağı istifadəsi azaldıla və elektrik şəbəkəsindən asılılıq minimuma endirilə bilər.

Bu həllər modul və sistemli şəkildə tətbiq olunduqda, ADY-nin uzunmüddətli enerji xərclərini azalda və karbon izini əhəmiyyətli dərəcədə kiçildə bilər. Karbon monetizasiyası, yaşıl maliyyə və yüklərin dəmir yoluna keçirilməsi üçün strateji logistika tərəfdaşlıqları da vacibdir.

Uzunmüddətli enerji alqı-satqı müqavilələri (PPA) özəl investisiyaları cəlb edə bilər, performansa əsaslanan lizinq isə inkişaf etmiş texnologiyaların tətbiqini asanlaşdıra bilər. AİB sektorları inteqrasiya edən, texnologiyanı modernləşdirən və iqlim liderliyini nümayiş etdirən layihələrə üstünlük verir.